Баргузории Рӯзи дави миллӣ дар пойтахт

Душанбе, 19.05.2014 (АМИТ «Ховар», Фарзонаи Давлат).- 18-уми май дар Тоҷикистон Рӯзи дави миллӣ баргузор шуд.
Ин пойгаи оммавӣ дар шаҳри Душанбе аз собиқ дидбонгоҳи Бозрасии давлатии автомобилии Чорбоғ шурӯъ шуда, дар “Наврӯзгоҳи пойтахт” ба анҷом расид. 
Дар маросими ифтитоҳи Рӯзи дави миллӣ дар пойтахт Руқия Қурбонова, муовини раиси шаҳри Душанбе ва Маликшоҳ Неъматов, раиси Кумитаи ҷавонон, варзиш ва сайёҳии назди Ҳукумати Тоҷикистон иштирокдорони дави миллиро табрик гуфта, онҳоро ба тарзи ҳаёти солим даъват намуданд.   
Бино ба гуфтаи Маликшо Неъматов сол ба сол шумораи иштирокчиёни ин чорабинӣ бештар мешавад ва ҳадафи аслии Рӯзи дав ҳам солимии ҷомеа аст. «Танҳо миллати солим ва бардам метавонад як ҷомеаи солимро бунёд кунад»,- гуфт М. Неъматов, раиси Кумитаи ҷавонон, варзиш ва сайёҳӣ зимни ифтитоҳи Рӯзи дави миллӣ дар пойтахт.
Тавре ки аз Кумитаи миллии олимпии кишвар хабар доданд, дар маросими дави миллӣ дар пойтахт 35 ҳазору 871 нафар иштирок намуда, ба  масофаҳои гуногун давиданд.