Баррасии ҳамкориҳои Тоҷикистон бо Бонки ҷаҳонӣ

Душанбе, 28.05.2014 (АМИТ «Ховар», Фарзонаи Давлат).-Дар мулоқоти Сарвазири Ҷумҳурии Тоҷикистон Қоҳир Расулзода бо директори иҷроияи Бонки ҷаҳонӣ Йорг Фриден, ки имрўз доир гардид, масоили ҳамкориҳои дуҷонибаи Тоҷикистон бо бонки мазкур мавриди баррасӣ қарор дода шуданд.Таваҷҷуҳи асосӣ ба масъалаи ҳамкориҳои дуҷониба дар татбиқи лоиҳаи бузурги минтақавии хатти барқи баландшиддати КАСА-1000 ва стратегияи ҳамкориҳои Ҷумҳурии Тоҷикистон бо Бонки ҷаҳонӣ барои солҳои минбаъда зоҳир карда шуд.Ҷонибҳо дар мулоқот омодагию ҳавасмандии худро ҷиҳати боз ҳам тақвият бахшидани ҳамкориҳои молиявии дуҷониба изҳор намуда, аз сатҳи ҳамкориҳои имрўза дар бахшҳои гуногун изҳори қаноатмандӣ карданд.Хотиррасон бояд кард, ки Йорг Фриден дар гурӯҳи Бонки ҷаҳонӣ Ҷумҳурии Тоҷикистонро намояндагӣ мекунад.