Баррасии Паём дар минтақаи Кӯлоб

  Кӯлоб, 7.05.2014. (АМИТ «Ховар»,  Сулаймони  Хол).-Паёми имсолаи Сарвари Давлат Эмомалӣ Раҳмон, ки фарогири самтҳои асосии сиёсати дохилию хориҷии мамлакат буда, ҳамчун дастури раҳнамо баҳри рушди ҳамаҷонибаи кишвар хидмат мекунад, аз ҷониби вакили Маҷлиси намояндагони Маҷлиси Олии Ҷумҳурии Тоҷикистон Сафаралӣ Раҷабов бо роҳбарони ташкилоту корхона, фаъолон ва қишрҳои гуногуни ҷомеа дар ноҳияҳои Муъминобод, Ховалингу Шӯрообод мавриди баррасӣ қарор гирифт. Сафаралӣ Раҷабов зикр кард, ки беҳтар намудани сатҳу сифати зиндагӣ дар шаҳру ноҳияҳои кишвар аз афзалиятҳои сиёсати давлатӣ ба шумор рафта, дар давраи истиқлолият бо ин мақсад 42,5 миллиард сомонӣ сарф шудааст. Ҳукумати мамлакат  ният дорад, ки дар 7 соли оянда барои рушди минтақаҳои мамлакат беш аз 110 миллиард сомонӣ равона созад. 
            Ҳамин гуна вохӯриҳои вакилони Маҷлиси намояндагони Маҷлиси Олии ҶТ дар ҷамоатҳои деҳоти ноҳияи Кӯлоб бо занону духтарон доир шуд. Зикр шуд, ки дар байни аъзои Ҳукумат имрӯз шумораи занон ду баробар зиёд гардида, дар мақомоти олии намояндагии кишвар 11 нафар зан фаъолият дорад. Аз 18 300 нафар хизматчии давлатӣ, ки дар мақомоти марказиву маҳаллии ҳокимияти давлатӣ ва ҷамоатҳо фаъолият доранд, 4315 нафар ё 24 фоизро занон ташкил медиҳанд.