Боздиди А. Иброҳим аз «Ширкати алюминийи Тоҷикистон»

Душанбе, 21.05.2014. (АМИТ «Ховар», Фарзонаи Давлат).-Имрўз муовини Сарвазири мамлакат Азим Иброҳим  бо фаъолияти истеҳсолии Корхонаи  воҳиди  давлатии «Ширкати алюминийи Тоҷикистон»  шинос  шуд.
Хотиррасон бояд кард, ки дар асоси дастуру супоришҳои бевоситаи Президенти Ҷумҳурии Тоҷикистон аз ҷониби Ҳукумати мамлакат барои дастгирии давлатӣ, таҳким бахшидани иқтидори истеҳсолии корхона, таҷдид ва навсозии таҷҳизоти  кории он  тадбирҳои амалӣ андешида мешаванд.
Дар асоси ин дастуру супоришҳо дар ояндаи наздик ҳукумати мамлакат бо ҷалби мутахассисони варзида ба таҳияи нақшаи навсозӣ ва таҷдиди коргоҳҳои алоҳидаи ин корхонаи азими саноатӣ, ки аз соли 1975 инҷониб ба истеҳсоли маҳсулот машғул мебошад, иқдом хоҳад кард.
Тавре ки маълум шуд, ҳолати кунунии корхонаи мазкур дар маҷмӯъ хуб буда,  новобаста ба мушкилот ва  шароити номувофиқи имрўзаи  бозори  ҷаҳонии алюминий фаъолият дорад.  
Муовини Сарвазири мамлакат аснои шиносоӣ бо роҳбарият ва мутахассисони корхона масъалаи  ба эътидол овардани иқтидори истеҳсолӣ, истифодаи ашёи хоми маҳаллӣ, таъмини гилхок,  таҷдиду навсозии таҷҳизоти коргоҳҳои алоҳидаи корхона бо назардошти пешрафт ва навоварии технологияи ҳозиразамони ҷаҳонӣ, таҳкими иқтидори истеҳсолӣ ва истеҳсоли маҳсулоти рақобатпазири алюминиро мавриди баррасӣ қарор дод.