Бозёфти хумҳои 3000- сола дар Фархор

Фархор, 21.05.2014. (АМИТ «Ховар», Сулаймони Хол).-Ба иттилои директори  Осорхонаи  таърихию кишваршиносии ноҳияи Фархор  Азизулло Муродов аз ҷониби бостоншиносон дар деҳаи  30-солагии  ҷамоати деҳоти Ватан   7 адад хуми  сафолин ёфт шуд, ки таърихи   3000-сола доранд. Ба гуфтаи манбаъ,  хумҳо  аз заминҳои  кишти   пахта бозёфт гардида,  баландии    хумҳо аз 1м 20 см  то   1м 65 см мебошад, ки  хумҳои калонтарин ба шумор мераванд. Дар дохили як хум устухонҳои қисми  поёнии косахонаи сар ва сутунмуҳраи одам дарёфт гардид, ки  дар айни ҳол  дар осорхона ҳамчун ёдгориҳои таърихии     чандинсола  ҷойгир карда   шудаанд. 
Мавриди зикр аст, ки  дар  осорхона   зиёда  450 адад  нигораи таърихӣ мавҷуд мебошад, ки  аксари  бозёфтҳо  ба асрҳои  19 ва 20- и  мелодӣ  тааллуқ доранд.  Дар айни ҳол   аз Академияи бостоншиносии  ҶТ 8 нафар бостоншинос  дар ноҳия    ба кофтукови  ёдгориҳои таърихӣ оғоз намудааст. Гуфта мешавад дар ноҳия 33 ҷои таърихӣ мавҷуд мебошад, ки дар оянда  аз ҷониби бостоншиносон  ёдгориҳои таърихии ин мавзеъҳо пурра муайян  мешаванд.