Г. Бердимуҳаммедов Ш. Зуҳуровро ба Ашқобод даъват кард

Душанбе, 6.05.2014.(АМИТ «Ховар», Марзия Саидзода).-«Ташрифи Шумо, ба Тоҷикистон дар таърихи навини муносиботи Тоҷикистону Туркманистон саҳифаи наверо боз карда, ба рушди босубот, дӯстию бародарии устувори халқҳои ҳар ду кишвар мусоидат менамояд». Ин матлабро Шукурҷон Зуҳуров- раиси Маҷлиси намояндагони Маҷлиси Олии Ҷумҳурии Тоҷикистон дар ҷараёни мулоқот бо Гурбонгулӣ Бердимуҳаммедов- Президенти Туркманистон баён кард. Дар ҷараёни мулоқот муҳимтарин масъалаҳои мавриди таваҷҷуҳи тарафайн- тавсеаи ҳамкориҳо дар заминаҳои сиёсӣ, иқтисодӣ, иҷтимоӣ, фарҳангӣ, ҳамкориҳои парлумонӣ ва вазъи минтақа мавриди баррасӣ қарор гирифт. Зикр шуд, ки ба имзо расидани санадҳои нави ҳамкорӣ зимни сафари расмии Президенти Туркманистон ба Тоҷикистон аз густариши муносибатҳои гуногунсоҳаи ҳар ду кившар шаҳодат медиҳад. Шукурҷон Зуҳуров афзуд, ки дар баробари рушди муносибатҳои дуҷонибаи кишварҳоямон, тавофуқи мавқеъҳоямон, дар масъалаҳои сиёсати байналмилалӣ ва минтақавӣ, дастгирии тарафайни ташаббусҳо дар созмонҳои байналмилалӣ ва минтақавӣ, инъикосгари тақвияти равобити ҳасанаи Душанбеву Ашқобод аст. Дар ин ин росто бояд ҳамкориҳои байнипарлумонӣ тақвият дода шаванд, таъкид кард Ш. Зуҳуров. Умедворем, ки гурӯҳҳои парлумонии дӯстӣ ва ҳамкорӣ дар ин росто фаъол хоҳанд шуд, хусусан дар самти таҳкими заминаи ҳуқуқию шартномавии муносибатҳои байнидавлатӣ, иҷрои шартномаю созишномаҳои имзошуда. Президенти Туркманистон Гурбонгулӣ Бердимуҳаммадов аз натиҷаи сафараш ба кишвари мо изҳори қаноатмандӣ намуда, гуфт, ки баланд гардидани нуфуз ва эътибори Тоҷикистон дар арсаи байналмилалӣ самараи талошҳои бесобиқаи Президенти Ҷумҳурии Тоҷикистон Эмомалӣ Раҳмон ва парлумони ин кишвар аст. Меҳмони олиқадр афзуд, ки имрӯз фурсати муносиб барои анҷоми фаъолиятҳои иқтисодӣ дар Тоҷикистону Туркманистон фаро расидааст. Сармоягузорони ду кишвар метавонанд аз тарҳҳои муштарак истифода намуда, барои густариши ҳамкориҳои иқтисодӣ саҳми муносиб гузоранд. Мусоҳибон зимни мулоқот аз сатҳи ҳамкориҳои дуҷониба дар заминаҳои гуногун ибрози қаноатмандӣ карда, ҳамзамон бар зарурати густариши ҳарчи бештари ин равобит таъкид карданд.Дар фарҷоми мулоқот Президенти Туркманистон Гурбонгулӣ Бердимуҳаммадов аз Шукурҷон Зуҳуров даъват намуд, ки дар вақти барояш муносиб бо сафари расмӣ аз Туркманистон дидан намояд. Ин даъват бо самимият пазируфта шуд.