Хони идонаи шаҳрдорӣ барои марзбонон

Душанбе, 22.05.2014.(АМИТ “Ховар”, Марзия Саидзода).-28 майи соли 2014 ба таъсиси Қӯшунҳои сарҳадии Кумитаи давлатии амнияти миллии Ҷумҳурии Тоҷикистон 20 сол сипарӣ мегардад.  Дар иртибот ба ин барои таҷлили сазовори ин санаи таърихӣ дар пойтахт раиси шаҳри Душанбе Маҳмадсаид Убайдуллоев қарори марбута ба тасвиб расонд. Тибқи ин қарор раиси шаҳр ба муовинон, раисони ноҳияҳои шаҳр ва роҳбарону масъулини сохторҳои дахлдори пойтахт дастур додааст, ки нақшаи чорабиниҳои дар қарори мазкур дарҷгардидаро дар тамоми қисмҳои низомии пойтахт таъмин намоянд. Инчунин Сарраёсати молияи шаҳри Душанбе муваззаф гардидааст, ки аз ҳисоби маблағҳое, ки аз тариқи эҳсонкорӣ барои дастгирии молиявии қисмҳои низомӣ ба суратҳисоби махсус ворид шудаанд, тадбирҳо андешад ва муҳосиботи дастгоҳи раиси шаҳр ба андозаи 100 000 сомонӣ барои Сарраёсати Қӯшунҳои сарҳадии Кумитаи давлатии амнияти миллӣ дар робита ба таҷлили 20-солагии ин сохтор ҷудо намояд. Инчунин аз сӯи шаҳрдорӣ дар иртибот ба таҷлили сазовори Рӯзи марзбонон -28 май дар қисмҳои низомии 2620, 2604, 9889, 2938, 2654, 2712 ва 2611, ки марбут ба Қӯшанҳои сарҳадии Кумитаи давлатии амнияти миллии Ҷумҳурии Тоҷикистонанд, барномаҳои фарҳангию маърифатӣ ташкил шуда, барои афсарону сарбозон хони идона ороста мешавад.