Имкониятҳои истифодаи манбаъҳои таҷдиди неруи барқ

   Душанбе, 21.05.2014. (АМИТ «Ховар,  Лайло Тоирӣ). —   Чанде  пеш директори Маркази  оид ба  рушди  неругоҳҳои   хурди барқии Тоҷикистону  Норвегия Қодиров  Фурқат ва менеҷери  лоиҳаҳо Саидова  Дилором аз  маъмурияти  Минтақаи  озоди  иқтисодии «Суғд» боздид  намуданд,  ки  мақсад  аз  он  таҳқиқи  вазъи  таъмини  корхонаҳои  саноатии  Минтақаи  озоди  иқтисодӣ  бо неруи  барқ  ба  манзури роҳандозии технологияҳои   сарфакунандаи  барқ буд.
Дар  ин  маросим  роҳбари  маъмурияти Минтақаи  озоди  иқтисодии «Суғд» Фирдавс  Олимов  ва  кормандони  гурӯҳи  тарҳрезии  стратегӣ  ширкат  доштанд.
Тавре  ки  аз Минтақаи  озоди  иқтисодии  «Суғд»  хабар  доданд,  маркази   рушди  гидроэнергетикаи  хурди  Тоҷикистону  Норвегия  дар  асоси Ёддошти  ҳусни тафоҳуми  байни  Вазорати  корҳои  хориҷии  Шоҳигарии  Норвегия  ва  Ҳукумати  Ҷумҳурии Тоҷикистон таъсис  ёфтааст.
Дар  ҳоли  ҳозир маркази Норвегияю  Тоҷикистон  лоиҳаеро  дар  амал  татбиқ  менамояд, ки  мақсад  аз он  таҳлили  фоидабахшии  гидроэнергетика ва ироаи тавсияю  пешниҳодҳо барои  истифодаи  манбаъҳои  таҷдиди неруи  барқ  аст.
Дар  ҷараёни  мулоқот масоили насби  генераторҳои  бодӣ ва  дастгоҳҳои  офтобии  тавлиди  неруи  барқ  дар  ҳудуди  Минтақаи  озоди  иқтисодӣ  ва  аҳамияти   дастгоҳҳои  мазкур  барои  беҳдошти  фаъолияти  ниҳодҳои  минтақаи  мазкур  мавриди  муҳокима  қарор  гирифтанд.