Имзои Созишномаи байни палатаҳои Тоҷикистон ва Ар — Риёд

Душанбе, 02.05.2014. (АМИТ «Ховар, Кристина  Эрлих). —  Раиси  Палатаи  савдо  ва  саноати  ҶТ Шариф  Саид  дар  ҳошияи  Анҷумани  иқтисодии  «Лигаи  кишварҳои  Араб +Осиёи  Марказӣ + Озарбойҷон» бо   раиси Палатаи  савдо  ва  саноати  шаҳри  Ар – Риёд (Арабистони  Саудӣ)  Абдураҳмон бани Абдуллоҳ  ал – Замил мулоқот  анҷом  дод.
Тавре  ки  аз  ПСС ҶТ  ба АМИТ «Ховар»  хабар  доданд, ҳадафи  асосии  мулоқот  иборат  аз  рушди  фаъолияти палатаҳо,  ҳамчунин ҳамкории тиҷоратию  иқтисодии байни  ҳар  ду  кишвар  буд. 
Ҷонибҳо  дар  ҷараёни  гуфтушунид  дурнамои  муносибатҳои  тиҷоратию  иқтисодии Тоҷикистон   ва  Арабистони  Саудӣ,  аз  ҷумла  роҳҳои  рушду таҳкими ҳамкории мустақими соҳибкорон,  бунёди  корхонаҳои  муштарак,  ҷалби  сармояҳои  инфиродӣ  ва  истифодаи технологияҳои муосир дар  бахшҳои афзалиятноки иқтисодиёти  Тоҷикистонро  маврди  муҳокима  қарор  доданд. 
Шариф  Саид ва Абдураҳмон  бани Абдуллоҳ ал – Замил  аз  рӯи натиҷаи  мулоқот  Созишномаи  ҳамкориро  ба  имзо  расониданд, ки  он қадами  наве  дар  рушди ҳамкории  тиҷоратию  иқтисодии байни ҳар  ду  кишвар  мебошад.
Созишнома  ташкили  иштироки  соҳибкорони  ҳар  ду  кишвар  дар  анҷуманҳои  доимӣ ва омӯзишу  татбиқи  имкониятҳои  ҳамкориро  дар  назар  дорад. Ҷонибҳо  ҳамчунин  дар  ҳошияи  созишнома  барои  ташкили  иштироки   соҳибкорони  ҳар  ду  кишвар  дар  конфронсҳо,  намоишгоҳҳо  ва  форумҳои  тоҷирону  соҳибкорон  ба  якдигар кӯмак  менамоянд.