Кафолат барои ҳимояи ҳуқуқҳои муҳоҷирон

Душанбе, 17.05.2014. (АМИТ «Ховар», Мавҷуда Анварӣ). -Раёсати Хадамоти муҳоҷирати Вазорати меҳнат, муҳоҷират ва шуғли аҳолии Ҷумҳурии Тоҷикистон дар вилояти Суғд дар ҳамкорӣ бо ҶДММ “Умури меҳнати ихтиёрии ҷавонон” гурӯҳи навбатии муҳоҷирони меҳнатиро ба Федератсияи Русия сафарбар намуд.  Аз рӯи маълумоти муовини сардори раёсат ҳамаи 62 нафар сафарбаршудагон сокинони ноҳияи Бобоҷон Ғафуров мебошанд. Дар асоси шартномаи басташуда онҳо ба муҳлати 11 моҳ дар ноҳияи Дмитровский, вилояти Маскав ба корҳои мавсимӣ машғул мешаванд. ҶДММ “Умури меҳнати ихтиёрии ҷавонон” барои муҳоҷирони меҳнатӣ сафари бехатар, ҳимояи ҳуқуқҳои онҳо, ҷои хобу истироҳат ва маоши хубро кафолат дода, расмикунонии ҳуҷҷатҳояшонро пурра ба зимаи худ гирифтааст.