Кумаки Хадамоти гумрук ба маъюбон

 Душанбе, 29.05.2014. (АМИТ «Ховар», Раъно Нусратуллозода ).- Имрӯз бахшида ба Рӯзи байналмилалии ҳифзи кӯдакон, ки ҳамасола 1 июн дар тамоми ҷаҳон ҷашн гирифта мешавад, аз тарафи  Хадамоти гумруки назди Ҳукумати Ҷумҳурии Тоҷикистон ба мактаб-интернати низомаш махсуси ҷумҳуриявӣ,  воқеъ дар ноҳияи Ҳисор, ки дар он зиёда аз 300 нафар кӯдаки маъюб тарбия меёбад, кумак расонида шуд.
 Дар ҷамъомад муовини сардори Хадамоти гумрук Неъматҷон Раҳматов  аз номи роҳбарияти хадамот ҳамаи тарбиятгирандагони мактаб-интернатро бо идашон табрик гуфта, зикр намуд, ки маъюбон ҳамеша таҳти сарпарастии Ҳукумати мамлакат  қарор доранд ва ҳадафи асосии сиёсати иҷтимоии давлат- ин фароҳам овардани шароит барои зиндагӣ ва таҳсили шоистаи ятимону маъюбон ва муҳтоҷону камбизоатон мебошад.
  Дар чорабинии мазкур бо иштироки ҳунармандони Театри ҷумҳуриявии лӯхтак ва  ғолибони озмуни «Овози тиллоӣ» барномаи фарҳангӣ доир гардида, зиёфат дода шуд.