Лағви 8 қарор дар бораи ихроҷи муҳоҷирон аз Русия
Душанбе, 16.05.2014. (АМИТ «Ховар, Лайло Тоирӣ). – Бо мусоидати Намояндагии хадамоти муҳоҷирати ҶТ дар ФР ва суди шаҳри Маскав 8 қарори судҳои ноҳиявӣ дар бораи ихроҷи маъмурии шаҳрвандони Тоҷикистон лағв гардид.
Тавре ки аз Намояндагии ҶТ дар ФР хабар доданд, 10 апрел суди шаҳри Маскав аризаи шикоятии шаҳрванди ҶТ Шокирҷон Хуршедшоҳзодаро унвонии ҳуқуқшиносони Намояндагӣ дар мавриди қарори суди ноҳия дар бораи ихроҷи маъмурӣ аз қаламрави Русия қонеъ гардонид. Қаблан суди ноҳияи Перови шаҳри Маскав дар бораи ихроҷи Шокирҷон Хуршедшоҳзода ва аз ӯ ситонидани ҷарима дар ҳаҷми 5000 рубл қарор бароварда буд.
Суди шаҳри Маскав баъди баррасии ҳамаи ҳуҷҷатҳои пешниҳодкардаи ҳимоятгар қарори суди ноҳияро бо далели «вуҷуд надоштани қонуншиканӣ» бекор намуд.