Маҳфили эҷодии Ӯлмас Ҷамол

Душанбе, 19.05.2014. (АМИТ «Ховар», Раъно Нусратуллозода).-17 май дар Иттифоқи нависандагони Тоҷикистон бахшида ба 80-солагии шоири шинохтаи ӯзбекзабон Ӯлмас Ҷамол маҳфили адабӣ доир гардид. Дар ҷамъомад шоиру нависандагони ҷумҳурӣ, намояндагони илму адаб, фарҳанг,  мухлисони эҷодиёти устод Ӯлмас Ҷамол иштирок намуданд.
Дар чорабинӣ раиси Иттифоқи нависандагони Тоҷикистон Меҳмон Бахтӣ оид ба фаъолият ва эҷодиёти соҳибҷашн сухан гуфта, афзуд, ки Ӯлмас Ҷамол шоир, тарҷумон ва рӯзноманигори маъруф буда, дар рушди адабиёти муосир  хизматҳои назаррас кардааст. Дар назди ҳозирин адибон Камол Насрулло, Сайидалӣ Маъмур, Гулрухсор, Шодмон Ҷӯраев, намояндагон аз Иттифоқи нависандагони вилояти Суғд ва Хатлон сухан гуфта, аз ашъори Ӯлмас Ҷамол шеърҳо қироат намуданд.
  Дар хатми маҳфили эҷодӣ шоир Ӯлмас Ҷамол ба Сарвари Давлат ва Иттифоқи нависандагони ҷумҳурӣ барои фароҳам овардани фазои созгори эҷодӣ изҳори миннатдорӣ намуд.