Меъёри бозтамвил тағйир ёфт

Душанбе, 21.05.2014. (АМИТ «Ховар», Лайло Тоирӣ).-Бо Қарори навбатии Раёсати Бонки миллии Тоҷикистон аз 19 майи соли 2014 меъёри бозтамвил ба андозаи 1,1 банди фоизӣ баланд ва дар сатҳи 5,9 фоизи солона муқаррар гардид. Бино ба иттилои хадамоти матбуоти бонк, тағйироти навбатӣ бо назардошти коҳиши рушди иқтисодиёт дар кишварҳои шарикони асосии тиҷорат, ки бештар ба номуайянии бозорҳои молиявии ҷаҳонӣ алоқаманд мебошад, инчунин барои пешгирии таъсири манфии омилҳои берунӣ ба нишондиҳандаҳои макроиқтисодӣ ва бо мақсади таъмини самаранокии сиёсати пулию қарзӣ ҷиҳати муътадил нигоҳ доштани ҳаҷми пул дар муомилот ворид шудааст. Қайд кардан бамаврид аст, ки маротибаи аввал имсол меъёри бозтамвили Бонки миллии Тоҷикистон 10 январи соли равон ба андозаи 0,7 банди фоизӣ паст ва дар сатҳи 4,8 фоизи солона муқаррар шуда буд.