Мошинҳои ёрии таъҷилӣ барои занони ҳомила

Душанбе, 20.05.2014. (АМИТ «Ховар», Лайло Тоирӣ).-Тавре ки аз хадамоти матбуоти Вазорати тандурустӣ ва ҳифзи иҷтимоии аҳолии Ҷумҳурии Тоҷикистон  иттилоъ доданд, вазорат тибқи барномаи ҳамкориҳои Ҷумҳурии Тоҷикистон бо Ҷумҳурии Федеративии Олмон дар доираи лоиҳаи «Беҳтарсозии сифати кӯмаки тиббӣ ба модарону навзодон дар вилояти Хатлон, марҳилаи I — II» бо мақсади дастрасӣ ва беҳтарсозии ёрии тиббии фаврӣ ба аҳолӣ барои беморхонаҳои марказии ноҳияҳои Ёвон, Хуросон ва Хамадонии вилояти Хатлон 3 нақлиёти ёрии таъҷилии тиббӣ тақдим намуд. 
Зимни супоридани мошинҳо ба масъулони ноҳияҳои номбурда муовини вазир Наврӯз Ҷунайдуллоев гуфт, ки ҳадафи асосӣ ин сари вақт расонидани кӯмаки тиббӣ ба занони ҳомила аст. Ҳамчунин таъкид гардид, ки нақлиёти мазкур имконияти расонидани кӯмаки босифат ва саривақтиро барои занон ҳангоми таваллуд дорад ва аз он бояд  самаранок истифода кард.