Муҳоҷирони меҳнатиро касби муносиб мебояд
Душанбе, 13.05.2014. (АМИТ «Ховар», Лайло Тоирӣ).- Тибқи иттилои Сарраёсати муҳоҷирати меҳнатӣ, бо мақсади омӯзиши вазъи бозори меҳнати имрӯзаи Федератсияи Русия, ки дар он 95% муҳоҷирони меҳнатӣ-шаҳрвандони Ҷумҳурии Тоҷикистон фаъолияти корӣ менамоянд, Хадамоти муҳоҷирати Вазорати меҳнат, муҳоҷират ва шуғли аҳолӣ дар ҳамкорӣ бо Хадамоти федералии муҳоҷирати Русия зиёда аз 3000 номгӯи касбу ихтисоси коргариро, ки дар бозори меҳнати ин кишвар ба он ниёз доранд, дастрас карда, унвонии Вазорати маориф ва илми Ҷумҳурии Тоҷикистон манзур намуд. Дар асоси он “Таснифоти давлатии касбҳои коргарӣ, вазифаҳои хизматчиён ва дараҷаҳои тарифӣ дар Ҷумҳурии Тоҷикистон” таҳия шуд, ки он бо қарори Ҳукумати Ҷумҳурии Тоҷикистон тасдиқ гардид.
Ҳамзамон Хадамоти муҳоҷират бо мақсади истифода дар кори хизматӣ ва ба роҳ мондани омӯзиши касбҳои ҳозиразамони коргарӣ дар асоси таснифоти мазкур нусхаи онро ба литсейҳои касбӣ-техникӣ ва марказҳои таълимии Вазорати меҳнат, муҳоҷират ва шуғли аҳолии Ҷумҳурии Тоҷикистон пешниҳод намуд.