Мусобиқаи байналмилалии Ҷоми Каспий дар Боку

Душанбе, 28.05.2014. (АМИТ «Ховар», Ситораи Боймурод).- Имрӯз дастаи мунтахаби наврасони футболи Тоҷикистон (U-16) барои ширкат дар мусобиқаи байналмилалии Ҷоми Каспий ба Боку сафар кард. Мусобиқаи анъанавӣ аз 28-уми май то 6-уми июни соли равон дар пойтахти Озарбойҷон бо ширкати 12 дастаи мунтахаб дар чаҳор гурӯҳ баргузор мешавад. Дар мусобиқа футболбозони то 17-сола ширкат меварзанд. Тавре ки дар ин бора сомонаи Федератсияи футболи кишвар хабар додааст, дастаи мунтахаби наврасони Тоҷикистон дар гурӯҳи «С» бо тимҳои Ҷопон (29-уми май) ва Гурҷистон (30-юми май) рақобат мекунад.Гуфта мешавад, дастаҳое, ки дар гурӯҳҳо ҷойҳои аввалро мегиранд, ба даври ниманиҳоӣ роҳхат мегиранд. Дастаҳое, ки ҷойҳои дувумро соҳиб мешаванд, барои ҷойҳои 5-8-ум ва дастаҳое, ки дар гурӯҳҳо дар ҷойҳои охирин қарор мегиранд, барои ҷойҳои 9-12-ум талош хоҳанд кард.