“Нақши ҷавонон дар ҳалли мушкилоти раванди ҷаҳоншавӣ”-конфронс

Душанбе, 24.05.2014 (АМИТ «Ховар», Фарзонаи Давлат).-Дирӯз бахшида ба рӯзи ҷавонон дар Академияи илмҳои Тоҷикистон таҳти унвони: «Нақши ҷавонон дар ҳалли мушкилоти раванди ҷаҳонишавӣ» конфронси ҷумҳуриявии илмӣ-амалӣ баргузор гардид.Дар чорабинии мазкур Фарҳод Раҳимӣ, президенти Академияи илмҳои Тоҷикистон, Маликшоҳ Неъматов, раиси Кумитаи ҷавонон, варзиш ва сайёҳии назди Ҳукумати ҶТ ва дигар олимону академикҳо, инчунин олимони ҷавони АИТ иштирок доштанд. Тавре ки дар ин бора котиби масъули АИТ Сайёҳат Иброҳимова хабар дод, дар кори конфронс беш аз 90 олими ҷавон ва аспирантҳо маъруза карданд.Гуфта мешавад, ки иштирокчиёни чорабинии мазкур дар симои олимони ҷавон тамоми ҷавонони Тоҷикистонро бо рӯзи идашон табрик намуда, иброз доштанд, ки ҷавонони Тоҷикистон бояд на танҳо ифтихори давлати худ, балки ифтихори тамоми тоҷикони дунё гарданд ва умед пеш аз ҳама ба олимони ҷавони Тоҷикистон дорем, ки онҳо дар оянда илми тоҷикро дар тамоми дунё машҳур месозанд.