Нашри рисолаи дипломатҳои тоҷик

Душанбе, 7.05.2014(АМИТ «Ховар», Назир Назиров). — Нашриёти «Ирфон» рисолаи илмии дипломатҳои тоҷик Ҳамрохон Зарифӣ ва Аҳмадҷон Сатторов «Тоҷикистону Хитой: ташаккули сарҳадҳои давлатӣ” — ро зери таҳрири умумии академик Т.Назаров аз чоп баровард.
Тавре ба АМИТ «Ховар» яке аз муаллифони рисола  Ҳ.Зарифӣ иттилоъ дод, китоб ба муайянсозии хатти сарҳади давлатии миёни Тоҷикистон ва Хитой дар қисмати мушкилгузари ҷониби шарқии  кӯҳҳои Помир дар баландии аз 4100 то 6700 метр аз сатҳи баҳр ҷойгирбуда бахшида шудааст. Аз ҷумла, дар рисола ба вохӯриҳои чандинкаратаи ҳайатҳо, гурӯҳҳои корӣ, мулоқотҳои сатҳи олӣ бо мақсади ҳалли масоили сарҳадӣ бо ҶМЧ ва таъмини амнияти миллии  Тоҷикистон  таваҷҷӯҳ  дода шудааст.  
Ба гуфтаи муаллиф  дар рисола маводҳои зиёди воқеии тасдиқкунанда оид ба масъалаи мазкур ҷой дода шудааст, ки Тоҷикистон мушкилоти марзии бо кишвари ҳамсоя чандин аср мавҷудбударо судмандона ва созанда ҳал карда, манфиатҳои миллӣ ва амнияти ҷониби шарқии марзи худро таъмин намудааст.