Нишасти аҳли тиҷорати Шэнси ва Тоҷикистон

Душанбе, 19.05.2014. (АМИТ «Ховар, Кристина  Эрлих). – Бо  ибтикори  Палатаи  савдо  ва  саноати ҶТ  28  май  дар  шаҳри  Душанбе   нишасти намояндагони  аҳли  тиҷорати   музофоти  Шэнсии  ҶМЧ  ва   соҳибкорони  Тоҷикистон  баргузор  мегардад. Дар  ин  бора  аз  маркази  матбуоти  ПСС ҶТ  ба  АМИТ «Ховар»  хабар  доданд.
Мақсад  аз  ин  чорабинӣ  шиносоӣ бо  имкониятҳои иқтисодию инвеститсионии  кишвар  ва  гуфтушуниди  аҳли  тиҷорати Чин  бо  намояндагони  сохторҳои тиҷоратии  Тоҷикистон  аст.
Ба  ҳайати  Чин  намояндагони  бахшҳои  мухталифи тиҷорат  шомиланд. Онҳо  ҷонибдори  ҳамкорӣ  бо саноати  истихроҷи  маъдан  ва коркарди  фулузот,  индустрияи  сохтмонӣ,  фурӯши қисмҳои   эҳтиётӣ, тавлиди  матоъ, либос,  коркарди абрешим, маҳсулоти  кишоварзӣ,  содироти   меваю  сабзавоти  музофоти  Шэнсии  ҶМЧ  мебошанд.
 ПСС Тоҷикистон  ба  манзури  рушду  таҳкими  ҳамкории  дуҷониба  ва   васеъ  намудани  фазои  иттилоотӣ  омода  аст, ки   созишномаи  ҳамкориро  бо  Палатаи  савдо  ва  саноати  музофоти  Шэнси имзо намояд.