Омодагӣ ба давраи тирамоҳу зимистони оянда
Душанбе, 13.05.2014. (АМИТ «Ховар», Мавҷуда Анварӣ). -Мутобиқи моддаи 13 Қонуни конститутсионии ҶТ «Дар бораи Ҳукумати ҶТ», бо мақсади таъмини фаъолияти мунтазам ва босуботи соҳаҳои иқтисодиёт ва иҷтимоиёти ҷумҳурӣ ва ҳамоҳангсозии корҳо дар давраи тирамоҳу зимистони солҳои 2014-2015, Ҳукумати ҶТ аз 3 майи соли ҷорӣ Қарори «Нақшаи чорабиниҳо оид ба сари вақт омода намудани соҳаҳои иқтисодиёт ва иҷтимоиёти ҷумҳурӣ барои фаъолияти мунтазам ва самарабахш дар давраи тирамоҳу зимистони солҳои 2014-2015»-ро тасдиқ намуд.
Ба вазорату идораҳо, ташкилоту корхонаҳо, мақомоти иҷроияи ҳокимияти давлатии ВМКБ, вилоятҳо, шаҳри Душанбе ва шаҳру ноҳияҳо супориш дода шуд, ки то санаи 15-уми ҳар моҳ ба Вазорати рушди иқтисод ва савдои ҶТ оид ба иҷрои нақшаи чорабиниҳои пешбининамудаи банди 1 қарори мазкур маълумоти муфассал пешниҳод намоянд.
Барои ҳамоҳангсозии корҳо ҷиҳати фаъолияти мунтазами соҳаҳои иқтисодиёт ва иҷтимоиёти ҷумҳурӣ дар давраи тирамоҳу зимистони солҳои 2014-2015 бояд Ситоди ҷумҳуриявӣ оид ба сари вақт омода намудани соҳаҳои иқтисодиёт ва иҷтимоиёти ҷумҳурӣ барои фаъолияти мунтазам ва самарабахш дар давраи тирамоҳу зимистони солҳои 2014-2015 таъсис дода шавад.
Вазорати рушди иқтисод ва савдоро зарур аст, ки то 20-уми ҳар моҳ маълумоти ҷамъбастиро оид ба иҷрои нақшаи чорабиниҳои мазкур ба баррасии Ситоди ҷумҳуриявӣ манзур намояд.
Бо мақсади фароҳам овардани шароити мусоид барои омодагӣ ба давраи тирамоҳу зимистон якҷоя бо намояндагони вазорату идораҳои дахлдор ва мақомоти иҷроияи маҳаллии ҳокимияти давлатӣ мониторинги иҷрои саривақтии Нақшаи чорабиниҳои мазкурро дар маҳалҳо ба роҳ монад.
Назорати иҷрои қарори мазкур ба зиммаи муовини Сарвазири ҶТ-сарпарасти соҳа вогузор шудааст.