Озмуни журналистон бахшида ба Ҳайдар Алиев анҷом меёбад

Душанбе, 06.05.2014. (АМИТ «Ховар, Марҳабои Азамат). – Озмун барои таҳияи маводи беҳтарини журналистӣ дар мавзӯи «Ҳайдар Алиев – асосгузор ва меъмори Озарбойҷони навин», ки Сафорати Ҷумҳурии Озарбойҷон дар Ҷумҳурии Тоҷикистон эълон карда буд, анҷом меёбад. Мувофиқи шартҳои озмун, мӯҳлати охирини қабули маводҳо 6 майи соли ҷорӣ мебошад. Хотирнишон месозем, ки ба озмун ҳамаи хоҳишмандоне даъват шуда буданд, ки маводҳои эҷодкардаашон дар саҳифаҳои рӯзномаю маҷалла ё сомонаҳои Тоҷикистон ба забонҳои тоҷикӣ ё русӣ чоп шудаанд.Журналистон вазифадор буданд, ки маводи қаблан дар ВАО чопшудаашонро бо қайди «Ба озмун» ба Сафорати Озарбойҷон фиристанд.Тавре ки дар Сафорати Озарбойҷон хотирнишон сохтанд, ғолибони озмун 7 май соли ҷорӣ дар сомонаи www.azembassy.tj Сафорат эълон шуда, мукофотҳои ғолибони он дар маросими чорабинӣ ба ифтихори зодрӯзи Ҳайдар Алиев — 7 май супурда мешаванд.