Ш.Назаров мансаби президенти клуби «Регар – ТадАЗ» — ро тарк кард

Душанбе, 20.05.2014. (АМИТ «Ховар). —  Устоди  футболи  тоҷик,   Мураббии  шоистаи ИҶШС  Шариф  Назаров  мансаби президенти  клуби  футболи «Регар – ТадАЗ» — и  шаҳри  Турсунзодаро, ки  тайи  5  соли  охир  роҳбарии  онро ба  ӯҳда  дошт,  тарк  намуд. Дар  ин  бора Федератсияи  футболи  Тоҷикистон  хабар  медиҳад.
Шариф  Назаров  23  феврали  соли  1946  таваллуд шудааст. Мураббии   шоистаи  ИҶШС  ва ҶШС Тоҷикистон, Ходими  шоистаи  тарбияи  ҷисмонии  Ҷумҳурии  Тоҷикистон  мебошад. 
Шариф  Назаров  ба  ҳайси  мураббӣ  мукофотҳои  зиёде гирифтааст. Соли  1988 дастаи «Помир» — и  шаҳри  Душанбе  бо  роҳбарии  ӯ  дар  мусобиқоти  лигаи  якуми  ИҶШС  соҳиби  медалҳои тилло  гардида, ба  лигаи олӣ  роҳхат  пайдо  намуд. Дастаи  мунтахаби  миллии  ҷумҳурӣ соли 2006 бо  роҳбарии Шариф  Назаров Ҷоми Конфедератсияи  футболи Осиёро ба  даст  овард.