Суғд: Таъмири дубораи мактаби садамавӣ

Душанбе, 30.05.2014. (АМИТ «Ховар», Мавҷуда Анварӣ). -Бо иштироки  раиси вилояти Суғд Абдураҳмон Қодирӣ мактаби миёнаи рақами 28-и ноҳияи Спитамен пас аз таъмир дубора мавриди баҳрабардорӣ қарор гирифт. Бинои мактаб солҳои 90-уми қарни гузашта ба истифода дода шуда, дар ҳолати садамавӣ қарор дошт. Бинои мазкур бо 113 ҳазор доллар маблағгузории сафорати Ҷопон дар Тоҷикистон ва мақомоти маҳаллӣ аз таъмири куллӣ бароварда шуда, барои 240 нафар хонанда пешбинӣ гаштааст. Корҳои сохтмонӣ бо сифати хуб анҷом ёфтаанд. 
Аз ҷониби мақомоти иҷроияи ҳокимияти давлатии вилоят мактаби мазкур бо зиёда аз 400 адад мизу курсӣ, тахтаҳои синфӣ, 10 адад компютер  ва дигар ашёву лавозимоти хониш муҷаҳҳаз гардонида шуд. Ҳангоми боздид аз синфхонаҳо раиси вилоят ба донишандӯзии толибилмон мароқ зоҳир намуда, аз сатҳи пасти забондонии онҳо изҳори нигаронӣ намуд. Роҳбари вилоят толибилмонро ба забономӯзӣ, аз ҷумла омӯзиши забони давлатӣ ҳидоят намуд.