«Сурӯши Сталинград»- туҳфа ба шаҳрвандони Волгоград

Душанбе, 03.05.2014. (АМИТ «Ховар», Мавҷуда Анварӣ).- Ба муносибати 70-солагии пирӯзӣ дар муҳорибаи Сталинград  дар остонаи ҷашни Ғалаба китоби Мӯъмин Қаноат «Сурӯши Сталинград» бо забони русӣ дар шаҳри Волгоград ба нашр расид. Дар ин бора аз сафорати Тоҷикистон дар Федератсияи Русия хабар доданд. 
Достони «Сурӯши Сталинград»-ро аз забони тоҷикӣ ба забони русӣ шоир Роберт Рождественский  тарҷума кардааст. Олга Безбородова раиси маркази байналмиллалии кӯдакону наврасони шаҳри Волгоград мураттиби китоб мебошад.
Мӯъмин Қаноат бо достони «Сурӯши Сталинград» дар шаҳри Волгоград хеле маъруф аст ва дар давоми даҳсолаҳо ҷавонони ин шаҳр пораҳои ин достонро дар озмунҳо қироат мекунанд. Ин достон яке аз асарҳои беҳтарин дар бораи ҷоннисории мардуми ин шаҳри канори Волга дар солҳои ҶБВ ба шумор меравад.