Таҷрибаи политсияи Бавария баррасӣ гардид

Душанбе, 22.05.2014. (АМИТ «Ховар, Мавҷуда Анварӣ). — Дар Академияи Вазорати корҳои дохилӣ дар мавзӯи «Тайёр намудани кадрҳои роҳбарикунанда барои мақомоти ҳифзи ҳуқуқ: таҷрибаи политсияи Бавария» бо иштироки намояндагони Хазинаи «Ҳанс Зейдел», Донишгоҳи такмили ихтисоси хизматчиёни давлатии назди Президенти ҶТ, мақомоти ҳифзи ҳуқуқ, устодон ва курсантони Академия машаварат баргузор гардид.
Дар машварат роҳбари раёсати тайёркунӣ ва баланд бардоштани савияи касбии политсияи Бавария, Герд Энклинг дар мавзӯи «Фаъолияти политсия дар давлати демократӣ-ҳуқуқбунёд» маърӯза кард. Герд Энклинг зикр намуд, ки дар тайёркунии кадрҳои роҳбарикунандаи болаёқат ва баланд бардоштани савияи касбии кормандон аз таҷрибаи пешқадами политсияи давлатҳои мутараққӣ самаранок истифода бурдан лозим аст.  
Муовини сардори Академияи ВКД оид ба илм Каримҷон Солиев доир ба тайёр намудани кадрҳои роҳбарикунанда барои мақомоти ҳифзи ҳуқуқ ва истифода бурдани таҷрибаи пешқадами политсияи Бавария изҳори андеша намуд.