Тарҳи тангаҳои хотиравӣ

  Душанбе, 19.05.2014. (АМИТ «Ховар», Лайло Тоирӣ).-  Бонки миллии Тоҷикистон барои таҳияи тарҳи тангаҳои хотиравӣ бахшида ба 600-солагии шоир ва мутафаккири адабиёти классикии тоҷику форс Мавлоно Абдураҳмони Ҷомӣ, 700-солагии шоир, файласуф ва мутафаккири асри XIV Мир Сайид Алии Ҳамадонӣ, 20-солагии Конститутсия (Сарқонун)-и Ҷумҳурии Тоҷикистон ва 90-солагии пойтахти Ҷумҳурии Тоҷикистон шаҳри Душанбе озмун эълон менамояд.      
    Тавре ки аз хадамоти матбуоти бонк хабар доданд, хоҳишмандон бояд пешниҳоди худро то 30 майи соли 2014 ба нишонии: Ҷумҳурии Тоҷикистон, 734003, шаҳри Душанбе, хиёбони Рӯдакӣ, 107А бо қайди “Ба озмуни тарҳи тангаҳои хотиравӣ” дар рӯи лифофа манзур намоянд. Маводи пешниҳодшаванда бояд бо назардошти шартҳои озмун омода гарданд. Яъне: Дар паси ҳамаи тангаҳои хотиравӣ Нишони давлатии Ҷумҳурии Тоҷикистон бояд ҷойгир карда шавад. 
     Агар танга ба 600-солагии шоир ва мутафаккири адабиёти классикии тоҷику форс Мавлоно Абдураҳмони Ҷомӣ бахшида шуда бошад; 
     — дар рӯйи танга расми А.Ҷомӣ (ҳатмӣ) ва вобаста ба тахайюлоти рассом дигар чизҳо (китоб, хома ва ғайра) имкони илова намуданро дорад. Соли таваллуд ва вафот ҳатмӣ аст. 
     Ба 700-солагии шоир, файласуф ва мутафаккири асри XIV Мир Сайид Алии Ҳамадонӣ: 
 — дар рӯйи танга расми Мир Сайид Алии Ҳамадонӣ (ҳатмӣ) ва дигар иловаҳо имконпазир аст. Соли таваллуд ва вафот ҳатмӣ аст. 
     Бахшида ба 20-солагии Конститутсияи (Сарқонуни) Ҷумҳурии Тоҷикистон: 
     — дар рӯйи танга адади 20-сол бо ададҳои римӣ ё арабӣ (ҳатмӣ). Дигар чизҳо (китоб, харитаи кишвар ва ғайра) дар ин мавзӯъ имкони илова намудан дорад. 
 Вобаста  ба 90-солагии пойтахти Ҷумҳурии Тоҷикистон, шаҳри Душанбе: 
     — дар рӯйи танга адади 90-сол бо ададҳои римӣ ё арабӣ (ҳатмӣ), расми иншоотҳои навин ё таърихӣ, ҳайкалҳо, биноҳои маъмурӣ ё таърихии дар шаҳри Душанбе имкони илова намуданро дорад. 
     Арзиш бо сомонӣ дар рӯйи ҳамаи тангаҳо бо хоҳиши иштирокчии озмун нишон дода шавад (ҳатмӣ) (арзиш баъдан муайян мешавад). 
Озмун 1 июни соли 2014 дар  Бонки миллии Тоҷикистон ҷамъбаст мегардад.  Хоҳишмандон метавонанд аз тариқи телефони +(992) 44-600-31-21 маълумоти лозимиро дастрас намоянд.