Таъсиси Шӯрои миллӣ оид ба нуфус ва рушд

Душанбе, 02.05.2014. (АМИТ «Ховар). – Бо  ибтикори Маҷлиси  намояндагони  Маҷлиси  Олӣ дар  кишвар  Шӯрои  миллии  Ҷумҳурии  Тоҷикистон  оид ба  нуфус ва  рушд  таъсис  ёфт.
Тавре  ки  аз  намояндагии Бунёди  Созмони  Милали  Муттаҳид  дар  бахши  нуфус  хабар  доданд, шӯрои  мазкур  иборат  аз  вакилони Маҷлиси намояндагони  Маҷлиси  Олии  ҶТ,  намояндагони  Вазорати тандурустӣ ва  ҳифзи  иҷтимоии  аҳолӣ, Вазорати  меҳнат,  муҳоҷират  ва  шуғли  аҳолии  ҶТ,  Вазорати  корҳои  дохилии  ҶТ, Кумитаи  кор  бо  занон ва  оилаи  назди  Ҳукумати  ҶТ  мебошад.
Мақсад  аз  таъсиси  Шӯрои  миллӣ  вусъат  бахшидани   ҳамкории байниидоравӣ  барои  тарҳрезӣ ва  татбиқи  санадҳои қонунгузорӣ, иҷрои  вазифаҳои муштарак  барои муҳокимаи  масоили  нуфус ва  рушд, таҳлили  муштараки  иҷрои қонун дар  бахши  нуфус ва рушд мебошад. 
Чунин  сохторҳои  миллӣ  таъсис  ёфта  ва  дар  доираи парлумонҳои  кишварҳои  дигари  минтақаи  Осиё  фаъолият  доранд, вале  дар  Тоҷикистон Шӯрои  миллӣ  бори нахуст  аъзои  парлумон  ва  намояндагони  шохаҳои  дигари ҳокимият  ва ҷомеаи  шаҳрвандиро  муттаҳид  намуд. Шӯрои  миллӣ  ба афзун  намудани  ҳуқуқҳои  ҳар  фард  барои ҳаёти  арзанда  ва  ҳуқуқу  имкониятҳои  гуногун  саҳми   назаррас  мерасонад.