Тоҷикистон – Филиппин: реҷаи раводид лағв шуд

Душанбе, 27.05.2014. (АМИТ «Ховар»). – Дар асоси созишномаҳои баимзорасидаи Тоҷикистону Филиппин акнун шаҳрвандони ҳар ду кишвар барои сайру сафар ба мамлакатҳои якдигар ба гирифтани раводид зарурат надоранд. Тавре ки аз Вазорати корҳои хориҷии Тоҷикистон хабар доданд, мувофиқи қоидаҳои нав шаҳрвандони Тоҷикистон метавонанд, ки бидуни раводид 30 рӯз дар ҳудуди Филиппин бошанд.Шаҳрвандони Тоҷикистон барои будубош дар қаламрави Филиппин бояд шиносномаи хориҷӣ, чиптаи бозгашт ё чиптаи сафар ба кишвари сеюмро дошта бошанд.Қобили зикр аст, ки Тоҷикистон ба манзури рушди туризм дар кишвар имконияти то соли 2016 бо 80 кишвари ҷаҳон бекор намудани реҷаи раводидро баррасӣ менамояд.