Ваҳдати миллӣ ва мақоми он дар ғалаба дар ҶБВ

    Душанбе, 22.05.2014. (АМИТ «Ховар,  Лайло  Тоирӣ). —  Имрӯз ,  22  май,  дар  вилояти  Нижный  Новгороди Федератсияи  Русия  конфронси  илмии  шаҳрии «Ваҳдати  миллӣ  ва  мақоми он  дар ғалаба  дар  ҷанги  Бузурги  Ватанӣ» баргузор  мегардад.
Конфронс  бо  ибтикори  Созмони  минтақавии ҷамъиятии «Конгресси халқҳои форсизабон»  якҷоя  бо  Осорхонаи  таърихи  мақомоти  ҳифзи  ҳуқуқ ва Қувваҳои  мусаллаҳи  Созмони  минтақавии Нижный  Новгород  ва  Китобхонаи  давлатии  бачагонаи  ин  вилоят роҳандозӣ  мешавад. 
Тавре  ки  раиси Созмони  минтақавии ҷамъиятии «Конгресси  халқҳои  форсизабон» Эраҷ  Боев  хабар  дод,  мақсад  аз  ин  чорабинӣ  иборат  аз  инъикоси  мақоми  ваҳдати  миллӣ дар  Ғалабаи  бузург, шиносоии  мардуми  Русия  бо   саҳми  намояндагони миллатҳои  гуногун,  аз ҷумла  саҳми  халқи  тоҷик ба  ҳифзи  Ватан мебошад.
Қобили  зикр  аст, ки халқи  Тоҷикистон  ҳам  дар  ҷабҳа  ва  ҳам дар  ақибгоҳ  ба ғалабаи умумӣ  ҳисса  гузоштааст.  
Дар  кори  конфронс  намояндагони муассисаҳои  илмӣ,  кишваршиносон,  муаррихони  соҳаи  ҳарбӣ,  роҳбарони ҷамъиятҳои  фарҳанги  миллии  минтақа ва хонандагони  муассисаҳои  таҳсилотӣ иштирок  менамоянд.