«Ватанро обод мекунем!»-нидои ҷавонон

 Душанбе, 22.05.2014. (АМИТ «Ховар, Мавҷуда Анварӣ). -Ҳамоиши ҷавонони шаҳри соҳили «Баҳри тоҷик» — Қайроққум ба ифтихори таҷлили Рӯзи ҷавонони Тоҷикистон аз сафороии намояндагони ташкилоту корхонаҳо, муассисаҳои таълимӣ ва ҷамоату шаҳракҳо оғоз ёфт.
Расми гузашти ҷавонон аз кӯчаи марказии шаҳр оғоз гардид, ки дар он ҷавонони зиёд дар даст шиору овезаҳо, Парчами давлатӣ, аксҳои Президенти мамлакат ва дигар Қаҳрамонони Тоҷикистонро доштанд ва бо нидоҳои «Ватанро обод мекунем!», «Ояндаи Тоҷикистон шукуфон аст!», «Мо созандагони ояндаи диёрем!» сӯи маркази Сомониён равона буданд.
Сипас, дар маркази Сомониён чорабинии идона доир шуд, ки дар он Худойназар Амонзода, раиси шаҳри Қайроққум кулли ҷавонони шаҳрро бо Рӯзи ҷавонони Тоҷикистон табрик гуфт.
Дар ин рӯз инчунин ба хонандагони пешсаф шаҳодатномаи гирандагони идрорпулии Президенти мамлакат ва раиси шаҳри Қайроққум дар вазъияти тантанавӣ супорида шуд.