ВКД: мусодираи зиёда аз 37 кг маводи нашъаовар

 Душанбе, 29.05.2014. (АМИТ «Ховар», Муқаддас Темурзода). -Дирӯз кормандони мақомоти корҳои дохилӣ аз муомилоти ғайриқонунӣ зиёда 37 килограмм маводи нашъаоварро мусодира намуданд. Тавре ки маркази матбуоти ВКД ҶТ хабар медиҳад, зимни гузаронидани чорабиниҳои фаврӣ-ҷустуҷӯӣ дар шаҳри Душанбе мошини тамғаи “Mersedes — Bens” зери идораи сокини 42-солаи ноҳияи Восеъ шаҳрванд Фатҳулло Сатторов боздошт гардид.
Ҳангоми кофтукови мошин аз дохили он 24 кг 660 грамм маводи нашъаовари навъи ҳашиш ва 9 кг 650 грамм маводи нашъадори сахттаъсири героин дарёфт ва мусодира шуд.
Ҳангоми санҷиш муайян гардид, ки маводи нашъадори мазкур ба ронанда ва мусофири он Нуралӣ Муродов, сокини 49-солаи ноҳияи Ҳамадонӣ тааллуқ доранд.
Ҳамчунин дар вақти гузаронидани як чорабинии фаврии дигар дар ҳудуди шаҳри Конибодом сокини 37-солаи ноҳияи Ашт Ҳақиқатхон Урмонова бо гумони муомилоти ғайриқонунии маводи мухаддир дастгир гардид. Дар вақти кофтукови шахсӣ аз дастгиршуда 2 кг 805 грамм маводи нашъадори ҳашиш дарёфт ва мусодира шуд.
Дар маҷмӯъ маводи нашъадори мусодирашуда 37 кг 115 граммро ташкил медиҳанд.
Аз рӯи ҳодисаҳои мазкур парвандаи ҷиноӣ аз рӯи моддаи 200 қ. 4 (муомилоти ғайриқонунии маводи нашъаовар ё моддаи псхотропӣ бо мақсади фурӯш) оғоз гардида, тафтишот идома дорад.