Вохӯрии чоруми сеҷонибаи Ташаббуси АҚТ

Душанбе, 30.05.2014. (АМИТ «Ховар, Мавҷуда Анварӣ). — Дар Агентии назорати маводи нашъаовари назди Президенти Ҷумҳурии Тоҷикистон вохӯрии чоруми сеҷонибаи шахсони мансабдори калони сохторҳои зиддимухаддиротии Ташаббуси Афғонистон, Қирғизистон ва Тоҷикистон (АҚТ) баргузор гардид, ки дар кори он инчунин намояндагони Раёсати СММ оид ба маводи нашъаовар ва ҷинояткорӣ иштирок намуданд. Вохӯрӣ дар чорчӯбаи таҳияи Барномаи Раёсати СММ оид ба маводи нашъаовар ва ҷинояткорӣ- «Барномаи минтақавии дастгирии кӯшишҳо дар мубориза бар зидди маводи нашъаовар дар Афғонистон ва кишварҳои ҳамсоя барои солҳои 2011-2014» гузаронида шуд.
Мақсади асосии вохӯрӣ омода намудани маводе мебошад, ки ба баланд бардоштани ҳамкории самаранок дар соҳаи мубориза бар зидди муомилоти ғайриқонунии маводи нашъаовар ва идораи сарҳадӣ байни Ҷумҳурии Исломии Афғонистон, Ҷумҳурии Қирғизистон ва Ҷумҳурии Тоҷикистон равона   шудаанд.
Маҷмӯи ҳуҷҷатҳо барои баррасӣ дар ҷараёни вохӯрии вазирон -роҳбарони сохторҳои зиддимухаддиротии Тоҷикистон, Афғонистон ва Қирғизистон пешниҳод  мешавад, ки он имрӯз, 30 май дар Душанбе баргузор мегардад.  Дар назар аст, ки дар анҷоми вохӯрӣ Протоколи якҷоя ба имзо расад.