Вохӯрии кормандони ХМ бо сокинони Варзоб
Душанбе, 15.05.2014. (АМИТ «Ховар», Лайло Тоирӣ).-Дар ноҳияи Варзоб дар мавзӯи «Раванди муҳоҷирати меҳнатӣ ва нововариҳо дар қонунгузории муҳоҷирати Федератсияи Русия” вохӯрӣ баргузор гардид, ки дар он кормандони масъули Раёсати Хадамоти муҳоҷират (ХМ) дар шаҳри Душанбе ва шаҳру навоҳии тобеи ҷумҳурӣ ва сокинони ноҳия иштирок намуданд.
Бино ба иттилои Раёсати Хадамоти муҳоҷират дар шаҳри Душанбе, дар вохӯрӣ аслан масъалаҳои навовариҳо дар самти қонунгузории муҳоҷирати Федератсияи Русия баррасӣ гаштанд. Ҳамарӯза кормандони ин раёсат ба муроҷиаткунандагон, ки азми сафари Русия доранд, маслиҳатҳои ҳуқуқӣ дода, ба ҳар яке аз онҳо ба тариқи ройгон 13 намуд буклети гуногун оид ба қонунгузории Федератсияи Русияро тақсим мекунанд. Ба иштирокчиёни ҷамъомад ҳамаи паҳлӯҳои қонуни будубоши шаҳрвандони ҷумҳурӣ дар кишвари Русия фаҳмонида шуд.
Дар вохӯрӣ иштирокчиёни имкон доштанд, андешаҳояшонро дар мавриди мушкилоте, ки шаҳрвандони мо дар Русия дучор мегарданд, бобати надонистани забони русӣ, риоя накардани қонунҳои ин кишвар, надоштани корти муҳоҷиратӣ ва ғайра иброз намоянд.. Онҳо таъкид намуданд, ки пеш аз сафар ба хориҷи кишвар ҳар шаҳрванди мамлакат бояд ҳатман забони давлати воридшударо донад ва аз қонунҳои он бархурдор бошад.
Дар вохӯрӣ беш аз 200 нафар сокини ин ноҳия иштирок намуд.