Воридоти мол 10,7 фоиз зиёд гардид

Душанбе, 06.05.2014. (АМИТ «Ховар», Лайло Тоирӣ).- Гардиши савдои хориҷӣ дар моҳҳои январ-марти соли ҷорӣ 1,2 млрд. доллари ИМА-ро ташкил намуд, ки нисбат ба ҳамин давраи соли гузашта 3,7 фоиз кам аст.  Тавре ки аз хадамоти матбуоти Бонки миллии Тоҷикистон иттилоъ доданд, ҳаҷми гардиши савдои хориҷӣ бо кишварҳои ИДМ 30,4 фоиз зиёд ва бо кишварҳои хориҷаи дур 25,1 фоиз коҳиш ёфт. Ҳаҷми содироти молҳо дар ин давра бинобар коҳиш ёфтани нархи маҳсулоти содиротӣ дар бозорҳои ҷаҳонӣ дар муқоиса ба ҳамин давраи соли гузашта 37,1 фоиз кам гардида, 227,6 млн. доллари ИМА-ро ташкил дод. Воридоти молҳо бинобар зиёд гардидани даромаднокии аҳолӣ ва ба ин васила зиёд гардидани унсури талабот нисбат ба ҳамин давраи соли қаблӣ 10,7 фоиз зиёд гардида, 927,4 млн. доллари ИМА-ро ташкил намуд. Вобаста ба ин, тавозуни савдо дар ин давра манфӣ ҷамбаст гардида, ба 699,8 млн. доллари ИМА баробар шуд, ки нисбат ба ҳамин давраи соли гузашта 46,9 фоиз зиёд мебошад.