Ғолибони «Нозирони навраси ҳаракати роҳ» муайян гардиданд

Душанбе, 3.06.2014. (АМИТ «Ховар», Зарангези Латиф).-Аз 27-уми  май то 1-уми июни соли ҷорӣ дар Маҷмааи муолиҷавии «Садбарг»-и шаҳри Душанбе озмуни ҷумҳуриявии «Нозирони навраси ҳаракати роҳ» бо иштироки дастаҳои минтақаҳои гуногуни ҷумҳурӣ  баргузор гардид.
Дастаи мактаббачагони шаҳри Конибодом дар озмуни ҷумҳуриявӣ ғолиб омада, дар нахустин озмуни байналмилалии «Нозирони навраси ҳаракати роҳ», ки бо иштироки дастаҳои ҷумҳуриҳои Тоҷикистон, Қазоқистон ва Федератсияи Русия  доир гардид, қуввозмоӣ намуд.
Дар натиҷа дастаҳои Ҷумҳурии Тоҷикистон (дастаи мактабиёни Конибодом) ва Ҷумҳурии Қазоқистон бо ба даст овардани холҳои баробар ҷойи аввал ва дастаи Федератсияи Русия ҷойи думро сазовор гашт.
Ба ғолибон диплом, ифтихорнома ва туҳфаҳои хотиравии Вазорати корҳои дохилии Ҷумҳурии Тоҷикистон супорида шуданд.