Ҳадяи Сафири Ҷопон ба Китобхонаи миллӣ

Душанбе, 09.06.2014. (АМИТ “Ховар”, Раъно Нусратуллозода).-Сафири Ҷопон дар Тоҷикистон  Хироюки Имахаши охири ҳафтаи гузашта беш аз 700 адад китобу маҷалла ва мусаввараҳое, ки дар он кишвари афсонавии Ҷопон инъикос ёфтаанд, ба Китобхонаи миллии Тоҷикистон тақдим кард.  
Тавре котиби матбуоти китобхона Фотима Яқубова ба АМИТ “Ховар” иттилоъ дод, дар маросими китобсупорӣ директори Китобхонаи миллии Тоҷикистон Носирҷон Салимов  аз Сафири Ҷопон дар Тоҷикистон  барои туҳфаи китобҳо изҳори миннатдорӣ намуда, иброз дошт, ки ҳамкориҳои муштарак минбаъд низ идома  хоҳанд ёфт.
Бояд гуфт, ки китобҳои тақдимшуда гуногунсоҳа буда, дар шуъбаи адабиёти хориҷаи Китобхонаи миллӣ дар  Гӯшаи Ҷопон барои  истифодаи муштариён ва шахсоне, ки таваҷҷуҳ ба омӯзиши ин кишвари афсонавӣ  доранд, нигоҳдорӣ мешаванд.