Ҳамоиши оммавӣ бар зидди нашъамандӣ

Душанбе, 25.06.2014. (АМИТ «Ховар», Раъно Нусратуллозода).- Имрӯз аз соати 17 то 19 -30 дақиқа дар саҳни майдони 800- солагии Маскав бахшида ба Рӯзи байналмилалии мубориза бар зидди маводи нашъадор ҳамоиши оммавӣ баргузор мегардад. Ҳамоиш бо ибтикори мақомоти иҷроияи ҳокимияти шаҳри Душанбе ва Маркази миллии мониторинг ва пешгирии нашъамандии Вазорати тандурустӣ ва ҳифзи иҷтимоии аҳолии Ҷумҳурии Тоҷикистон сурат мегирад.Тавре ки сардори бахши робита бо ҷомеаи Маркази миллии мониторинг ва пешгирии нашъамандии Вазорати тандурустӣ ва ҳифзи иҷтимоии аҳолии Ҷумҳурии Тоҷикистон Комрон Ёқубов ба хабарнигори АМИТ «Ховар» иттилоъ дод, ҳамоиш бо мақсади муборизаи дастаҷамъона бо ин падидаи номатлуб барпо мешавад. Ёдовар мешавем, ки 26 июн ҳамчун Рӯзи байналмилалии мубориза бар зидди маводи нашъадор дар тамоми ҷаҳон ҷашн гирифта мешавад.