Ҷашни ваҳдати тоҷикон дар Озарбойҷон

Душанбе, 26.06.2014 (АМИТ «Ховар»).- Бо ибтикори Сафорати Ҷумҳурии Тоҷикистон дар Ҷумҳурии Озарбойҷон бахшида ба Рўзи ваҳдати миллӣ ва 17-ўмин солгарди баимзорасидани Созишномаи умумии истиқрори сулҳ ва ризоияти миллӣ дар Тоҷикистон чорабинии идона доир шуд.Тавре аз Сафорати Ҷумҳурии Тоҷикистон дар Ҷумҳурии Озарбойҷон хабар доданд, чорабинии мазкур бо баргузории бозии варзишии футбол миёни кормандони Сафорат ва донишҷўёни тоҷик, ки дар донишгоҳҳои кишвари иқомат, аз ҷумла дар Омўзишгоҳи Олии ҳарбии ба номи Ҳайдар Алиев, Донишгоҳи Қафқоз, инчунин Консерваторияи миллии Озарбойҷон, таҳсил мекунанд, ифтитоҳ гардид. Боиси тазаккур аст, ки дар қисми расмии чорабинӣ ҷаноби Сафир Зоҳир Саидов иштирокчиёнро ба муносибати ин санаи пурифтихор ва барои миллату Ватан муҳим муборакбод намуда, бо дарназардошти аҳамияти тарбиявии он, дар мавриди худшиносӣ, ватанпарастӣ, канораҷўӣ аз тарѓиботи равияҳои гуногуни мазҳабӣ, қавмгороӣ, таҳдиди хатарҳои муосир, гардиши ғайриқонунии маводи мухаддир, огоҳӣ аз таъсири фарҳангҳои бегона ва ҷинояткориву ифротгароӣ таъкидҳо ба амал оварда, аз нақши таърихии ин санаи муборак ва садоқат ба якпорчагии кишвар, инчунин пос доштани ваҳдату дастовардҳои сулҳи тоҷикон, батафсил суханронӣ намуда, онҳоро ба ҳамбастагӣ ва ватандўстӣ даъват намуд.