Ҷавонони ИДМ дар “АвруОсиёи ҷавон” муттаҳид мешаванд

Душанбе, 11.06. 2014. (АМИТ «Ховар», Холисаи Асомиддин).-Аз 10 то 15 июни соли 2014 дар шаҳри Сахкадзори Ҷумҳурии Арманистон Форуми дуюми ҷавонон таҳти унвони “АвруОсиёи ҷавон” бо иштироки 150 сарварони ҷавони намояндагони ташкилотҳои ҷамъиятӣ-сиёсии кишварҳои пасошӯравӣ доир мегардад. Ташкилкунандагони форуми мазкур “Бунёди рушди ҳамкориҳои АвруОсиё” ва “Бунёди ҷавонони Арманистон” мебошанд.Ҷумҳурии Тоҷикистонро дар ин форум аъзои Шӯрои марказии Ташкилоти ҷамъиятии ҷавонон “Созандагони Ватан”, корманди масъули Дастгоҳи Кумитаи иҷроияи марказии Ҳизби Халқии Демократии Тоҷикистон Абдулло Нуров ва и.в роҳбари намояндагии Ташкилоти ҷамъиятии ҷавонон “Созандагони Ватан дар шаҳри Душанбе” Фирӯз Табаров намояндагӣ менамоянд.Бояд тазаккур дод, ки форуми мазкур бо мақсади муттаҳиднамоии намояндагони ташкилотҳои ҷамъиятӣ-сиёсии ҷавонон ва рӯзноманигорони ҷавони кишварҳои ИДМ, назди Балтика ва Гурҷистон доир мегардад.Тибқи барномаи форум баргузории тренингҳо ва мизҳои муддавар бо иштироки коршиносони Агентии итилоотии «Россия сегодня», намояндагони котиботи Созмони паймони амнияти дастаҷамъӣ, мақомоти иҷроия ва қонунгузории Федератсияи Россия, Маҷлиси миллии Ҷумҳурии Арманистон ва дигар кишварҳо, инчунин шиносоӣ аз ҷойҳои таърихии Арманистон пешбинӣ гардида, мубодилаҳои афкоре, ки дар нишастҳои “Сиёсатмадорони ҷавон”, “Рӯзноманигорони ҷавон” ва “Амнияти АвруОсиё” дар ин форум байни ҷавонон сурат мегиранд, ҷиҳати пайдо намудани иттилооти шаффофу холисона мусоидат хоҳанд намуд.