Ҷойгоҳи Ҷомӣ дар муколамаи фарҳангҳо

Душанбе, 10.06.2014. («АМИТ «Ховар», Раъно Нусратуллозода).- Бахшида ба 600- солагии шоир, мутафаккир, файласуф ва донишманди бузурги  адибиёти тоҷику форс Мавлоно Абдураҳмони Ҷомӣ 3-4 ноябри соли равон дар Донишгоҳи давлатии Хуҷанд ба номи академик Бобоҷон Ғафуров таҳти унвони «Ҷойгоҳи Абдураҳмони Ҷомӣ дар муколамаи фарҳангҳо» конфронси байналмилалӣ баргузор мегардад. 
Бино ба иттилои муовини ректори донишгоҳ оид ба илм Матлуба Хоҷаева ҳадаф аз гузаронидани ин ҳамоиш пеш аз ҳама  мусоидати ҳарчӣ бештар дар пажуҳиши рӯзгору осор, афкор ва андешаҳои адабиву ирфонӣ, фалсафиву ахлоқии шоир, инчунин баррасии авзои сиёсиву иҷтимоӣ, фарҳангиву илмӣ ва адабии асри Ҷомӣ, ҷараёнҳои фикриву адабӣ дар ин аҳд, нусхашиносӣ, тарҷума ва нашри осори адиб ва амсоли инҳо буда, дар он муҳаққиқони ватаниву хориҷӣ ҷалб мешаванд.