14,6 миллион $-и ФБРК ба Тоҷикистон

                  Душанбе, 25.06.2014.(АМИТ «Ховар», Марзия Саидзода).-Фонди байналмилалии рушди кишоварзӣ (ФБРК) барои  рушди соҳаи чорводории Тоҷикистон 14,6 миллион  $ маблағи грантӣ ҷудо менамояд. Дар ин росто 25 июн дар ҷаласаи навбатии иҷлосияи панҷуми Маҷлиси намояндагон вакилон  Созишнома дар бораи маблағгузорӣ байни Ҷумҳурии Тоҷикистон ва Фонди байналмилалии  рушди кишоварзӣ  оид ба лоиҳаи «Рушди чорводорӣ ва чарогоҳҳо»-ро ба тасвиб расонданд.  
      «Ин Созишнома 5 августи соли 2011 байни Ҳукумати Ҷумҳурии Тоҷикистон ва Фонди байналмилалии рушди кишоварзӣ дар Душанбе ба имзо расидааст», гуфт Ҷамолиддин Нуралиев -муовини аввали  вазири молияи ҷумҳурӣ. Лоиҳаи мазкур аз моҳи сентябри соли 2012 оғоз гардида, сентябри соли 2017 ба анҷом расонида мешавад. Ин лоиҳа дар 7 навоҳии ҷануби Тоҷикистон — Балҷувон, Ховалинг, Шӯрообод  Муъминобод, Восеъ, Темурмалик ва Фархор, ки аҳолияшон бештар ба чорводорӣ машғуланд, татбиқ мегардад. 
       Ҳадафи лоиҳаи мазкур мусоидат ба коҳиш додани сатҳи камбизоатӣ, баланд бардоштани сатҳи  истеҳсоли маводи ғизоӣ ва даромади 22 ҳазору 400 хонавода  тавассути афзоиши маҳсулнокии  чорводорӣ дар  навоҳии мазкур мебошад. Бо татбиқи лоиҳа саршумори чорво афзун гардида, механизми  мукаммали идораи чарогоҳҳо ҷорӣ  мешавад. Инчунин дар ҷараёни татбиқи лоиҳа дастгирии занон дар коркард ва фурӯши маҳсулоти чорво низ пешбинӣ гардидааст.  Бо мақсади сари вақт ва самаранок амалӣ гардонидани  лоиҳа бо Қарори ҳукумати ҷумҳурӣ Муасссисаи давлатии маркази идораи  рушди идораи чорводорӣ  ва чарогоҳҳо таъсис дода шуда,  Вазорати кишоварзии мамлакат агенти иҷроияи лоиҳа маҳсуб меёбад. 
   Дар доираи татбиқи лоиҳаи мазкур ташкили беш аз 100 ҷамъияти истифодабарандаи чарогоҳҳо дар сатҳи ҳар як деҳаи ноҳияҳои интихобшуда, сохтмони  56  клиникаи ветеринарӣ ва таъмини онҳо бо таҷҳизот, сохтмон ва барқарорсозии қубурҳои  оби нӯшокӣ, хариди мошинолоти кишоварзӣ, гузаронидани хати қувваи барқ, сохтмони кӯпрукҳои хурд, таъминот бо нақлиёти кишоварзӣ,  хариди чорвои хушзот, идораи чарогоҳҳо амалӣ мешавад.