Афзоиши истеҳсоли металҳои қиматбаҳо

Душанбе, 14.06.2014. (АМИТ «Ховар», Мавҷуда Анварӣ).-Давоми панҷ моҳи соли ҷорӣ корхонаҳои соҳаи саноати маъдани кӯҳӣ ва металҳои қиматбаҳо ба маблағи 478,6 миллион сомонӣ маҳсулот истеҳсол намудаанд, ки нисбат ба ҳамин давраи соли гузашта 87,9 миллион сомонӣ зиёд буда, суръати афзоиш 122,5 фоизро ташкил медиҳад. Маҳсулоти дар ин давра истеҳсолшуда дар дохил ва хориҷи кишвар ба фурӯш бароварда шудаанд. Муовини сардори Раёсати саноати маъдани кӯҳӣ ва металҳои қиматбаҳои Вазорати саноат ва технологияҳои нави кишвар Абдулвоҳид Кассиров гуфт, ки нуктаи муҳим он аст, 56 фоизи маҳсулот ба хориҷи кишвар содирот шуда, аз ин ҳисоб ба ҷумҳурӣ 358,9 миллион сомонӣ ворид гардид.