Андӯхтаҳои Ҷ. Азизқулов дар «Андӯхти рӯзгор»

 
Душанбе, 11.06.2014. (АМИТ «Ховар», Раъно Нусратуллозода).-Дирӯз дар Китобхонаи миллии Тоҷикистон рӯнамоии китоби “Андӯхти рӯзгор”-и олим, адиб ва тарҷумони маъруфи тоҷик Ҷумъабой Азизқулов баргузор гардид.
 Дар рӯнамоии китоби мазкур директори китобхона Носирҷон  Салимов  афзуд, ки китоби тозанашри “Андӯхти рӯзгор” армуғонест ба ҷашни 80-солагии Ҷумъабой Азизқулов мебошад.
Раиси Иттифоқи нависандагони Тоҷикистон Меҳмон Бахтӣ оид ба ҳаёту фаъолияти Ҷумъабой Азизқулов сухан гуфта, ба ӯ мусаввараеро, ки мавзеи беҳтарини зодгоҳаш дар он ҷо тасвир ёфтааст ва нишони сарисинагии Иттифоқи нависандагони Тоҷикистонро тақдим намуд.
  Раиси Энсиклопедияи миллии тоҷик Нурмуҳамад Амиршоҳӣ, доктори илмҳои филологӣ Абдунабӣ Сатторзода, академики Академияи илмҳои Тоҷикистон  Хуршеда Отахонова оид ба зиндагинома ва кору фаъолияти Ҷумъабой Азизқулов ва перомуни китоби мазкур андешаҳояшонро иброз намуданд.
Бояд гуфт, ки китоби “Андӯхти рӯзгор” аз андӯхтаҳои солҳои мухталифи муаллиф фароҳам омадааст ва масъалаҳои адабиёти гузаштаву имрӯзаи тоҷикро дар бар гирифта, ба муносибати 80- умин соли мавлуди муҳаққиқ ба табъ расидааст.