Баргузории мусобиқаи қаҳрамонии Осиё-2015 дар Шри-Ланка

Душанбе, 20.06.2014. (АМИТ «Ховар», Ситораи Боймурод).- Дар қароргоҳи Конфедератсияи футболи Осиё — Куала-Лумпури Малайзия қуръакашии мусобиқаи қаҳрамонии Осиё-2015 байни дастаҳои мунтахаби занонаи то 16-сола баргузор гардид. Тавре ки дар ин бора сомонаи  Федератсияи футболи кишвар хабар додааст, дар сабқати интихобии қаҳрамонии Осиё-2015 ҳамагӣ 21 даста: 12-то дар минтақаи Ғарб ва 9-то дар минтақаи Шарқ ширкат мекунанд.
 Дастаи мунтахаби занонаи футболи Тоҷикистон (U-16) бар асоси қуръакашӣ дар гурӯҳи «А» бо дастаҳои Ӯзбекистон, Шри-Ланка, Баҳрайн, Фаластин ва Қирғизистон рақобат мекунад. Мусобиқа аз 4-ум то 13-уми октябри соли равон дар Шри-Ланка баргузор мешавад. 
Тими мунтахаби Тоҷикистон бо раҳбарии Сулаймон Бобокалонов нахустин бозиашро 4-уми октябр бо дастаи Фаластин анҷом медиҳад. Баъдан футболбоздухтарони тоҷик 6-уми октябр бо дастаи Баҳрайн, 8-уми октябр бо мунтахаби Ӯзбекистон ва  11-уми октябр бо дастаи Шри-Ланка бозӣ мекунанд. Бозии охирини мунтахаби Тоҷикистон дар марҳалаи интихобӣ 13-уми октябр бо дастаи Қирғизистон баргузор мегардад.