Беҳтаринҳои футбол дар моҳи май киҳоянд?

Душанбе, 12.06.2014. (АМИТ «Ховар», Ситораи Боймурод).-Федератсияи футболи Тоҷикистон беҳтарин бозингар, беҳтарин мураббӣ ва беҳтарин доварро дар моҳи май муайян кард.  Тавре сомонаи Федератсияи футболи кишвар хабар медиҳад, Дилшод Восиев, ҳамлагар ва капитани дастаи “Истиқлол”-и Душанбе беҳтарин бозингар, Нуъмонҷон Юсуфов, сармураббии дастаи “Хуҷанд”-и Хуҷанд беҳтарин мураббӣ ва довари ФИФА Насрулло Кабиров аз шаҳри Норак беҳтарин довар дар моҳи май эълон шуданд. Ёдовар мешавем, легионер аз Гана Дэвид Мауто, ҳамлагари дастаи “Истиқлол” беҳтарин бозингар, Мубин Эргашев, сармураббии дастаи “Истиқлол” беҳтарин мураббӣ ва довари ФИФА Хуршед Дадобоев аз Хуҷанд беҳтарин довар дар моҳи март ва Хуршед Маҳмудов, нимҳимоятгари дастаи “Истиқлол” беҳтарин бозингар, Алишер Тухтаев, сармураббии дастаи “Энергетик”-и Душанбе беҳтарин мураббӣ ва довари ФИФА Парвиз Муртазоев аз Душанбе беҳтарин довар дар моҳи апрел эълон шуда буданд.