Безараргардонии қочоқбари афғон
Душанбе, 11.06.2014. (АМИТ «Ховар», Мавҷуда Анварӣ). — Шаби 9 ба 10 июн аз тарафи кормандони Раёсати Агентии назорати маводи нашъаовари назди Президенти Ҷумҳурии Тоҷикистон дар вилояти Хатлон дар якҷоягӣ бо хизматчиёни ҳарбии Отряди сарҳадии Панҷи Саррёсати Қӯшунҳои сарҳадии Кумитаи давлатии амнияти миллӣ кӯшиши интиқоли миқдори калони маводи нашъаовар ба ҳудуди Тоҷикистон пешгирӣ карда шуд.Дар яке аз минтақаҳои дидбонгоҳи сарҳадии Шӯркул ҳангоми интиқоли маводи нашъаовар задухӯрди мусаллаҳона ба вуқӯъ пайваст, ки дар натиҷаи он яке аз қочоқбарон Ғаффор валади Абдуғафури 45-сола, сокини вулусволии Имом Соҳиби вилояти Хатлон безарар гардонида шуд. Ҳаммаслаки ӯ бо номи Абдулло аз торикии шаб истифода бурда, ба самти Афғонистон фирор намуд. Субҳи рӯзи дигар ҳангоми азназаргузаронии ҷои ҳодиса ҷасади шаҳрванди Афғонистон, як адад камони шикории қутраш 12 мм, як адад борхалтаи полиэтиленӣ дарёфт шуд, ки дар дохили он 35 бастаи ҳашиш бо вазни зиёда аз 13 кг ва 3 бастаи героин бо вазни тахминан 3 кг мавҷуд буд. Аз рӯи ҳодисаи мазкур парвандаи ҷиноӣ оғоз гардида, тафтишот идома дорад.