Боздиди раиси Маҷлиси миллӣ аз «Итрон Франс»

Душанбе, 12.06.2014.(АМИТ «Ховар», Марзия Саидзода).- Дар ҷараёни сафари расмии худ раиси Маҷлиси миллии Маҷлиси Олии ҷумҳурӣ Маҳмадсаид Убайдуллоев ба Фаронса ба ширкати «Итрон Франс», ки беҳтарин корхонаи саноатии Фаронса дар соли 2013 ъэтироф гардидааст, ташриф овард. Раиси палатаи болоии Парлумони Тоҷикистон аз ҷараёни истеҳсолот, сифати маҳсулоти истеҳсолшаванда ва истифодаи технологияҳои муосири саноатӣ дар ин корхона шинос гардид. М. Убайдуллоевро Матиас Мартан -ноиби Президенти ширкати «Итрон Франс» ҳамроҳӣ намуда, доир ба иқтидори саноатии ин ширкат маълумот дод. М. Убайдуллоев аз сифати корҳои анҷомдодаи «Итрон Франс» дар доираи татбиқи Қарордоди DWSP2-01 Лоиҳаи дуюми обтаъминкунии шаҳри Душанбе оид ба таҳвили 76 500 адад обҳисобкунакҳои ҳуҷравӣ ба КВД «Обу коррези Душанбе», изҳори қаноатмандӣ намуд. Зикр шуд, ки барои кам кардани талафот ва сарфаи оби истеҳсолшуда тавассути насби ҳисобкунакҳои обӣ, ҷониби мо омодааст ҳамкориҳои мутақобилан судамандро бо «Итрон Франс» таҳким бахшад. Бо истифода аз зарфиятҳои «Итрон Франс», ки дар бозори ҷаҳонии истеҳсоли ҳисобкунакҳои обӣ мавқеи хоса дорад, масоили ташкили корхонаи муштараки насб ва таъмири ҳисобкунакҳои обӣ дар Душанбе матраҳ гардид.