«Бозингарон»-ҳимояи дипломии донишҷӯён
Душанбе, 12.06.2014. (АМИТ «Ховар», Раъно Нусратуллозода).-Дирӯз хатмкунандагони шуъбаи актиёрии факултаи санъати Донишгоҳи давлатии Хуҷанд ба номи академик Бобоҷон Ғафуров аз рӯи намоишномаи «Бозингарон» кори дипломии худро ҳимоя намуданд. Намоишномаи «Бозингарон» аз рӯи асари нависандаи рус Николай Гогол дар Театри давлатии мазҳака ва мусиқии Камоли Хуҷандӣ тибқи мавзӯи рисолаи хатми 4 нафар хатмкунандагони шуъбаи актёрии донишгоҳ ҷараён гирифт. Тавре сардори маркази иттилоот ва таҳлили Донишгоҳи давлатии Хуҷанд Маъмури Юсуфзод иттилоъ дод, донишҷӯён дар назди ҳозирин маҳорати актёрии худро нишон доданд. Дар имтиҳони давлатӣ баробари ҳакамон собиқадорони театр, пайвандон ва шавқмандони зиёди соҳа низ иштирок намуданд. Он хатмкунандагоне, ки давоми чаҳор сол дар факултаи санъати донишгоҳ таҳсил намуданд, бо намоиши ин асар маҳорати касбиашон дар назди ҳакамон ва устодон ба маърази тамошо ва санҷиш гузоштанд. Гуфта мешавад, ки ба хатмкунандагони шуъбаи актёрии факултаи санъат ҳунармандони касбии театр ва кино ба монанди Умар Алиев, Насриддин Маликов, Бароат Мақсудова ва чанде дигарон дарс гуфтаанд.Нақшофарии донишҷӯён аз аз ҷониби ҳозирин хуб пазируфта шуд. Дар анҷоми намоишнома Умар Алиев баромад намуда, аз нақшофарии шогирдон изҳори хушнудӣ намуда, гуфт ки барои ба рӯи саҳна омадани намоишномаи «Бозингарон» нафарони зиёд ҳамдастӣ ва мусоидат намуданд. Раиси имтиҳони давлатӣ Одилҷон Назаров нисбат ба маҳорати актёрии хатмкунандагон баҳои баланд дода, изҳори умедворӣ намуд, ки ба рӯи саҳна омадани ин насли ҷавони умедбахш ба рушди театри тоҷик мусоидат намуда, маҳорату дониши онҳо дар оянда дар ин ҷода сайқал хоҳад ёфт.