Бунёди бинои иловагӣ дар ДМИТ

Душанбе,23.06.2014. (АМИТ «Ховар», Раъно Нусратуллозода).-Муддати чандест, ки дар Донишкадаи молия ва иқтисоди Тоҷикистон (ДМИТ) таъмиру таҷдиди бинои нави таълимӣ идома дорад. Корҳои сохтмонии ин бинои нави таълимиро кормандони ширкати ҶДММ «Нузам» ба уҳда доранд.
Бино ба иттилои муовини ректор оид ба масъалаҳои иқтисодӣ ва маъмурию хоҷагии Донишкада Саймаҳмуд Қаландаров бинои мазкур чорошёна буда, дорои 24 ҳуҷраи корӣ, 34 синфхона, ду синфхонаи компютерӣ, толор барои баргузории конфронсу чорабиниҳо ва толори варзишӣ мебошад.  Ин бинои таълимӣ дар оғози соли хониши 2014 -2015 ба истифода дода мешавад.
Қайд кардан ба маврид аст, ки хобгоҳи нави донишҷӯён, ки дар шафати бинои таълимии мазкур ҷойгир аст, ҳамчунин пурра таъмиру тармим шуда, пеш аз оғози соли нави таҳсил мавриди истифода қарор хоҳад гирифт. Хобгоҳи мазкур низ чорошёна буда, ҳар як ошёна дорои 38 ҳуҷраи истиқоматӣ ва 4 ҳуҷраи ёрирасон аст.
Ҳамчунин дар паҳлӯи бинои хобгоҳи донишҷӯён бинои якошёнаи дигар аз таъмир бароварда мешавад, ки дар он китобхонаи электронӣ ва ошхонаи васеъ барои кормандону донишҷӯён ҷойгир карда хоҳад шуд.
Факултаҳои менеҷмент ва ҳуқуқи молиявӣ ва муносибатҳои иқтисодии байналмилалӣ дар ин бинои нав ҷо дода мешаванд.